Stefán Sölvi kominn í Heimsmetabókina ?

Jæja þá er maður kominn heim á klakann eftir skemmtilega ferð til Rússlands. Ég lagði af stað út aðfaranótt fimmtudagsins 12.ágúst og var kominn til Moskvu um miðjan daginn að staðartíma. Það var 40+ gráðu hiti úti en það var fínt miðað við að við fengum hótelherbergi sem var ekki með loftræstingu. Það var 34 stiga hiti í herberginu sem var alveg að gera út af við mig. En það gjörsamlega rann af manni svitinn allan sólarhringinn. Daginn eftir tókum við svo flug frá Moskvu til borgarinnar Ulyanovsk. Þar er ein af höfuðstöðvum flugfélagsins Antonov sem rekur einar stærstu cargo flugvélar í heiminum. En markmiðið var að draga eina 200tonna flugvél frá þeim og reyna að komast í heimsmetabók Guinness.

Á laugardaginn vorum við með æfingu til að fínpússa öll smáatriði og gekk það mjög vel. Svo kom sunnudagurinn, en þá var stór flugvélasýning og önnur skemmtanahöld í borginni og vorum við stór hluti af því. Við vorum 9 þarna saman komnir og tókum fyrst 3 greinar sem strongman sýningu fyrir áhorfendur. En það voru á bilinu 15 þúsund manns að horfa. Keppt var í bændagöngu, réttstöðu og þraut sem samanstóð af dekkjaveltu, drumbalyftu og sandpokahleðslu. Við renndum í gegnum þetta eins og létta æfingu og var ég í "5.sæti" eftir það.

 Svo kom að því að við drógum þessa flugvél fislétt en við vorum 9 að því. Ég, Zydrunas Savickas, Vidas Blekaitis, Mark Felix, Krystof Radzikowski, Stoyan Todorchev, Elbrus Nigmatulin, Tarmo Mitt og Mikhail Sidorchev. Við vorum á stiga sem er mun betra og var þetta bara fislétt. Stiginn var stuttur og við drógum vélina eitthvað nálægt 7 metrum minnir mig. Ég er nokkuð viss um að 4 menn gætu dregið vélina. En það kemur í ljós í framtíðinni :)

Allavega öðruvísi og skemmtileg ferð. En nóg komið af blaðri. Ég þarf að fara að æfa því það styttist í World´s Strongest Man keppnina :)